Тэрүнофүжи: Намайг нэг л хүн дэмжиж байхад тэр нэг хүний төлөө би барилдах ёстой

Мэргэжлийн сүмо бөхийн 73 дахь ёкозүна Тэрүнофүжи Г.Ган-Эрдэнэ эх орондоо ирээд байна. Аварга амрахаас гадна шинэ номынхоо нээлтийг хийхээр иржээ.

“Ангалын ёроолоос өгсөх маргааш” нэртэй түүний номын нээлт өчигдөр “Интерном” дэлгүүрт боллоо. Энэ ном хоёр жилийн өмнө Японд гарч, бестселлер болсон бөгөөд монгол хэл дээр орчуулагдан гарч байгаа нь энэ юм. Номыг сэтгүүлч Х.Эрдэнэцэцэг орчуулж,  Д.Нацагдоржийн шагналт яруу найрагч, зохиолч М.Уянсүх ариутган шүүжээ. Гэмтэл бэртэл, өвчин зовлон гээд олон бэрхшээлтэй тулгарч, озкэи цолоо алдан, жонидан зиндаа хүртэл унасан ч шантрашгүй зан, шаргуу хөдөлмөрийнхөө ачаар дахин өгсөж, сүмогийн оргил болсон ёкозүна цол хүртсэн Тэрүнофүжигийн түүх, замнал маш олон хүнд амьдрах итгэл, хичээн зүтгэх сэтгэлийн хүч хайрлажээ.

Номын нээлтийн дараа Тэрүнофүжи аваргын гэрт зочлон, ярилцсанаа уншигч олондоо хүргэе.  

-Юуны өмнө шинэ ном гаргасанд баяр хүргэе. Номын нээлт сайхан боллоо. Маш олон хүн ирлээ. Ном бичих санаа хэзээ төрөв? Хэр хугацаанд бичиж дуусгав?

-Дээд зиндаанд буцаж гараад, түрүүлсний дараа олон хүнээс ном бичээч гэсэн санал ирсэн. Ном уншихаар өөрийгөө магтаад байгаа юм шиг байдаг болохоор би анх ичих ч шиг, нэг л санаа зовоод байсан юм. Ер нь бол олон хүний шахалтаар анх эхэлсэн. Бичээд эхэлтэл дундаас нь хүмүүст урам зориг өгч болохоор юм байна, өөрийнхөө туулж ирсэн амьдралаа бас хүмүүст мэдрүүлэх ёстой юм байна гэсэн зүйлүүд толгойд орж ирэн, бичсээр байгаад хоёр жилийн өмнө ном маань бэлэн болсон.